| S | H | O | U | T |

Nasaan ang hiwaga na aking kailangan?
Upang ang pag-iisa ko'y maibsan.
Siya lang ang lunas sa sakit kong nararamdaman,
Nasaan ang hiwaga na aking kailangan?

Nasaan ang liwanag na aking kailangan?
Upang mahawi na ang lubos na kadiliman.
Siya lang ang lunas sa aking kabulagan.
Nasaan ang liwanag na aking kailangan?

Nasaan ang tala na aking kailangan?
Upang masambit na ang aking kahilingan.
Siya lang ang lunas sa aking pag-aabang.
Nasaan ang tala na aking kailangan?

Nasaan ang talino na aking kailangan?
Upang ako'y hindi na maging mangmang.
Siya lang lunas sa utak kong walang laman.
Nasaan ang talino na aking kailangan?

Nasaan ang karunungan na aking kailangan?
Upang ang isip ko ay hindi na maguluhan.
Siya lang ang lunas sa aking kababawan.
Nasaan ang karungan na aking kailangan?

Nasaan ang bayani na aking kailangan?
Upang malasap ko na ang aking kaligtasan.
Siya lang ang lunas para maalis sa kahirapan.
Nasaan ang bayani na aking kailangan?

Nasaan ang kalayaan na aking kailangan?
Upang ako'y makalipad na sa itaas na kalawakan.
Siya lang ang lunas para makalabas sa kulungan.
Nasaan ang kalayaan na aking kailangan?

Nasaan ang kapayapaan na aking kailangan?
Upang mapanatag na ang aking kalooban.
Siya lang ang lunas sa aking paggugulumihanan.
Nasaan ang kapayapaan na aking kailangan?

Nasaan ang pag-ibig na aking kailangan?
Upang ang puso ko'y matigil na sa kahibangan.
Siya lang ang lunas sa aking kasawian.
Nasaan ang pag-ibig na aking kailangan?

Nasaan ka, ikaw na aking kailangan?
Upang ang buhay ko ay magkaroon ng kabuluhan.
Ikaw lang ang siyang lunas sa aking kahinaan.
Nasaan ka, ikaw na aking kailangan?